चिनियाँ राजदूत झाङ माओमिङद्वारा परराष्ट्रमन्त्री शिशिर खनालसँग शिष्टाचार भेट

काठमाडौं, चैत २४ । नेपालका लागि जनवादी गणतन्त्र चीनका राजदूत झाङ माओमिङले आज परराष्ट्र मन्त्रालयमा सम्माननीय परराष्ट्रमन्त्री शिशिर खनालसँग शिष्टाचार भेटवार्ता गरेका छन् ।

उक्त भेटमा राजदूत झाङले चीनका परराष्ट्रमन्त्री वाङ यीको तर्फबाट परराष्ट्रमन्त्री खनाललाई उहाँको पदभार ग्रहणमा शुभकामना सन्देश सुनाएका थिए ।

सो अवसरमा नेपाल–चीन सम्बन्धलाई थप सुदृढ पार्ने तथा पारस्परिक हितमा रहने सहकार्यलाई अभिवृद्धि गर्ने विषयमा विभिन्न प्रकृतिका छलफल भएको जनाइएको छ ।

परराष्ट्र मन्त्रालयका अनुसार भेटवार्ता सौहार्दपूर्ण र रचनात्मक वातावरणमा सम्पन्न भएको थियो । दुई देशबीचको रणनीतिक साझेदारी तथा आपसी विश्वासलाई थप मजबुत बनाउने दिशामा छलफल केन्द्रित रहेको बताइएको छ ।