भारी हिमपातपछि अवरुद्ध मध्यपहाडी लोकमार्ग पुनः सञ्चालनमा

काठमाडौं, चैत ८। हिजाे चैत ७ गते परेको भारी हिमपातका कारण अवरुद्ध भएको मध्यपहाडी लोकमार्ग अन्तर्गत बागलुङ र पूर्वी रुकुमको सिमानास्थित पातिहाल्ने सडक खण्ड पुनः सञ्चालनमा आएको छ।

नेपाली सेनाको नेपाली सेना अन्तर्गतको चण्डीदल गणबाट खटिएको फौजले अन्य सुरक्षा निकायसँग समन्वय गरी सडकमा जमेको बाक्लो हिउँ पन्छाएपछि यातायात आवागमन पुनः सुचारु गरिएको हो।
हिमपातका कारण उक्त सडक खण्ड पूर्ण रूपमा अवरुद्ध हुँदा यात्रु तथा स्थानीयवासीहरू प्रभावित भएका थिए। सडक खुलाउन सुरक्षाकर्मीहरूले निरन्तर प्रयास गरेका थिए।

सडक सञ्चालनमा आएपछि यस क्षेत्रमा आवागमन सहज भएको स्थानीयले बताएका छन्। भारी हिमपातको समयमा जोखिमयुक्त क्षेत्रमा यात्रा गर्दा सतर्कता अपनाउन सम्बन्धित निकायले आग्रह गरेका छन्।