इरानद्वारा खाडी मुलुकका पाँच ऊर्जा संरचना खाली गराउन चेतावनी

काठमाडौं, चैत ४ । इरानको साउथ पार्स ग्यास फिल्डस्थित पेट्रोकेमिकल कम्प्लेक्समा भएको हवाई हमलापछि इरानी रेभोलुसनरी गार्ड्स कोर (आईआरजीसी) ले खाडी क्षेत्रका पाँच ऊर्जा संरचनामा आक्रमण गर्न लागेको भन्दै ती क्षेत्र खाली गर्न आग्रह गरेको बीबीसीले जनाएको छ।

इरानको क्रान्तिकारी सेनाले विश्वकै ठूलो प्राकृतिक ग्यास क्षेत्रमा भएको आक्रमणको प्रतिक्रियास्वरूप साउदी अरेबियाका दुई प्रशोधन केन्द्र, यूएईको एक ग्यास फिल्ड र कतारको एक प्रशोधन केन्द्रलाई निसाना बनाउने चेतावनी दिएको बीबीसीले जनाएको छ।

आईआरजीसीले ती केन्द्रवरपर रहेका मानिसहरूलाई तत्काल ठाउँ छाड्न भन्दै आगामी घण्टामा ती संरचनालाई निसाना बनाइने बताएको छ। उसले ती केन्द्रलाई 'वैध निसाना' का रूपमा परिभाषित गरेको छ।

यस घटनापछि खाडी क्षेत्रमा तनाव चुलिएको छ र अन्तर्राष्ट्रिय समुदायले स्थितिमाथि गम्भीर चासो व्यक्त गरेको छ। बीबीसीले उल्लेख गरेअनुसार यो घटनाले क्षेत्रीय सुरक्षामा ठूलो खतरा उत्पन्न गरेको छ।