भग्न सिंहदरवार वरिपरि झकिझकाउ उपहार गाडी

काठमाडौं, माघ २६ । फागुन २१ गते हुने प्रतिनिधिसभा सदस्य निर्वाचनका लागि भारतले नेपाललाई उपहार दिएको गाडी भदाै २४ गते जलाईएकाे सिंहदरबारको भवन वरिपरि पार्किङ गरेर राखिएकाे छ ।

गृह मन्त्रालयले अर्थ मन्त्रालयमार्फत निर्वाचन प्रयोजनका लागि वस्तुगत सहायताअन्तर्गत भारत सरकारसँग गाडी माग गरेको थियो । सोही अनुरूप भारत सरकारले गाडी उपलब्ध गराएको हो । यसपटकको निर्वाचनका लागि भारत सरकारले साना–ठूला गरी ६५० वटा गाडी उपलब्ध गराउने बताइएको छ ।

नेपालमा हुने हरेकजसो निर्वाचनमा भारतले नेपाललाई गाडी लगायत निर्वाचन सामाग्री सहयोगस्वरुप प्रदान गर्दै आएको छ।

नेपाललाई प्रदान गरिएकामध्ये मध्ये पछिल्लो लटका गाडीहरु २४ भदौको आगजनीमा परेको सिंहदरवारको पश्चिम र दक्षिणी भाग तर्फ राखिएका छन्। आगजनीमा परेर कुरुप बनेको सिंहदरवार परिसर यतिबेला भारतले प्रदान गरेका दर्जनौँ गाडीहरुले झकिझकाउ छ ।