देशका विभिन्न स्थानमा वर्षा तथा हिमपात, तुवाँलो क्रमशः हट्ने सम्भावना

काठमाडौं, फागुन २८ । देशका केही प्रदेशका पहाडी तथा हिमाली क्षेत्रमा पछिल्लो २४ घण्टामा वर्षा र हिमपात भएको छ। जल तथा मौसम विज्ञान विभागका अनुसार कोशी प्रदेशका पहाडी र हिमाली भू–भागका केही स्थानमा मेघगर्जन तथा चट्याङसहित हल्का देखि मध्यम वर्षा तथा हिमपात भएको छ।
विभागले आज बिहान ७ः०० बजे सार्वजनिक गरेको विवरणअनुसार बागमती र गण्डकी प्रदेशका पहाडी तथा हिमाली क्षेत्रका थोरै स्थानमा तथा लुम्बिनी प्रदेशका एक–दुई स्थानमा पनि मेघगर्जन र चट्याङसहित हल्का वर्षा तथा हिमपात भएको छ।
मौसम पूर्वानुमान महाशाखाका अनुसार हाल देशको अधिकांश भू–भागमा आंशिकदेखि सामान्य बदलीको अवस्था रहेको छ। आज दिउँसो कोशी, मधेश, बागमती, गण्डकी र लुम्बिनी प्रदेशका साथै कर्णाली र सुदूरपश्चिम प्रदेशका पहाडी तथा हिमाली क्षेत्रमा सामान्यतया बदली रहने तथा अन्य स्थानमा आंशिक बदली रहने सम्भावना छ।
त्यस्तै कोशी प्रदेशका साथै बागमती र गण्डकी प्रदेशका पहाडी तथा हिमाली भू–भागका केही स्थानमा मेघगर्जन तथा चट्याङसहित मध्यम वर्षाको सम्भावना रहेको विभागले जनाएको छ। साथै लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्र तथा मधेश प्रदेशका धेरै स्थानमा हल्का वर्षा हुन सक्ने सम्भावना रहेको छ।
आज राति पनि कोशी प्रदेश लगायत देशका पहाडी तथा हिमाली क्षेत्रमा सामान्य बदली रहने तथा अन्य भू–भागमा आंशिक बदली रहने मौसमविद्ले बताएका छन्। कोशी प्रदेशका केही स्थानमा तथा मधेश, बागमती र गण्डकी प्रदेशका पहाडी क्षेत्रमा मेघगर्जन तथा चट्याङसहित हल्का वर्षा हुने सम्भावना रहेको छ।
यसैबीच, जल तथा मौसम विज्ञान विभागले केही दिनदेखि देशका धेरै स्थानमा तुवाँलोको प्रभाव देखिएको छ। उच्च चापीय मौसम प्रणालीका कारण वर्षा हुन नसक्दा तुवाँलो वायुमण्डलको तल्लो तहमा थुप्रिएको विभागको भनाइ छ।
यद्यपि बिहीबारदेखि मौसम प्रणालीमा केही सक्रियता बढ्ने र देशका विभिन्न स्थानमा क्षणिक वर्षा हुन सक्ने भएकाले तुवाँलो क्रमशः घट्दै जाने सम्भावना रहेको विभागले जनाएको छ। विभागले तुवाँलोका कारण स्वास्थ्यमा पर्न सक्ने असरबाट बच्न आवश्यक सावधानी अपनाउन सर्वसाधारणलाई आग्रह पनि गरेको छ।