यूएईका राष्ट्रपतिसँग प्रधानमन्त्री कार्कीको टेलिफोन वार्ता: नेपाली समुदायको सुरक्षाबारे चासो

काठमाडौं, फागुन २३ । प्रधानमन्त्री सुशीला कर्कीले संयुक्त अरब इमिरेट्स (यूएई)का राष्ट्रपति शेख मोहम्मद बिन जायद अल नह्यानसँग टेलिफोन संवाद गरेकी छन्।
परराष्ट्र मन्त्रालयका अनुसार प्रधानमन्त्री कर्की र यूएईका राष्ट्रपतिबीच शनिबार दिउँसो भएको उक्त संवादमा मध्यपूर्व क्षेत्रमा विकसित भइरहेको परिस्थितिबारे विचार आदान–प्रदान गर्नुका साथै यूएईमा बसोबास गर्ने सबै बासिन्दाको सुरक्षा र सुरक्षाको अवस्थाबारे छलफल भएको हाे।
संवादका क्रममा दुवै नेताले संयमता अपनाउनुपर्ने आवश्यकता औंल्याउँदै अहिलेको परिस्थिति छिट्टै सामान्य हुने आशा व्यक्त गरेका थिए।
प्रधानमन्त्री कर्कीले यूएई सरकारले त्यहाँ रहेका सबै बासिन्दा, विशेषगरी नेपाली समुदायको सुरक्षा र हित सुनिश्चित गर्न अपनाएका कदमप्रति प्रशंसा व्यक्त गरेकी थिइन्।
यूएईका राष्ट्रपति अल नह्यानले कठिन परिस्थितिमा नेपालले देखाएको ऐक्यबद्धताका लागि प्रधानमन्त्री कर्कीलाई धन्यवाद दिएका थिए। साथै उनले मार्च १, २०२६ मा जायद अन्तर्राष्ट्रिय विमानस्थलमा कर्तव्य निर्वाहका क्रममा एक नेपाली नागरिकको निधन भएको घटनाप्रति गहिरो समवेदना व्यक्त गरेका थिए।
राष्ट्रपति अल नह्यानले नेपाली नागरिकहरूको इमान्दारिता, निष्ठा र समर्पणको प्रशंसा समेत गरेका बताइएको छ ।