प्रतिनिधिसभा निर्वाचनका लागि एकीकृत सुरक्षा योजना प्रभावकारी : प्रहरी महानिरीक्षक कार्की

काठमाडौं, फागुन २० । प्रहरी महानिरीक्षक दान बहादुर कार्कीका अनुसार भोलि हुने प्रतिनिधिसभा सदस्य निर्वाचन, २०८२ का लागि देशभर एकीकृत सुरक्षा योजना प्रभावकारी रूपमा कार्यान्वयनमा रहेको छ।
भोलि हुने प्रतिनिधिसभा सदस्य निर्वाचनको सुरक्षा व्यवस्थाबारे जानकारी दिँदै प्रहरी महानिरीक्षक दान बहादुर कार्कीले अहिलेको सुरक्षा तयारी सफल र सुदृढ रहेको बताएका छन्।
उनले नेपाली सेना, नेपाल प्रहरी, सशस्त्र प्रहरी बल र राष्ट्रिय अनुसन्धान विभागबीच समन्वयात्मक ढंगले काम भइरहेको उल्लेख गरे। “विद्यमान परिस्थितिबारे आ–आफ्नो ठाउँबाट सूचना संकलन, त्यसको विश्लेषण र आवश्यक सम्बोधन गर्ने काम नियमित रूपमा भइरहेको छ,” उनले भने, “गृह मन्त्रालयको नेतृत्वमा संयुक्त परिचालन भइरहेकाले सुरक्षा व्यवस्था मिलाउन झन सहज भएको छ।”

हिमाली क्षेत्रमा विशेष तयारी
हिमाली जिल्लाहरूमा मौसम अनुकूल रहे पनि चिसोका कारण चुनौतीपूर्ण अवस्था रहेको उनले बताए। मौसम पूर्वानुमान महाशाखाबाट प्राप्त विवरणअनुसार हाल हिउँपातको अवस्था नरहेको भए पनि अत्यधिक चिसो र दुर्गम भौगोलिक अवस्थालाई मध्यनजर गर्दै आवश्यक प्रबन्ध मिलाइएको छ।
निर्वाचनमा खटिने कर्मचारी र सुरक्षाकर्मीलाई समयमै गन्तव्यमा पुर्‍याउन केही स्थानमा हेलिकोप्टरमार्फत ‘हेली लिफ्ट’ तथा सामग्री ढुवानी (हेली ट्रक) को व्यवस्था गरिएको कार्कीले जानकारी दिए। सबै हिमाली र दुर्गम क्षेत्रमा सुरक्षाकर्मीहरू परिचालित भइसकेका छन्।मतदान दिनको सुरक्षा रणनीति
निर्वाचनको दिन केन्द्रीय तथा एकीकृत सुरक्षा योजनाअनुसार देशभर जनशक्ति परिचालन गरिने उनले बताए। आवश्यक परे एकल र संयुक्त रूपमा परिचालन हुने तथा आकस्मिक अवस्थाका लागि ब्याकअप जनशक्ति समेत तयारी अवस्थामा रहने जानकारी दिए।
मतदान केन्द्रमा कुनै अवाञ्छित गतिविधि भएमा कानुनी रूपमा बल प्रयोग गर्न सकिने अधिकारबारे सुरक्षाकर्मीलाई प्रशिक्षण दिइएको उनले बताए। प्रमुख जिल्ला अधिकारीको नेतृत्वमा आवश्यक कदम चालिनेछ।
उनका अनुसार मतदान केन्द्रको ‘क्लोज सर्कल’ भित्र मुख्य जिम्मेवारी नेपाल प्रहरीको रहनेछ भने जटिल परिस्थिति उत्पन्न भएमा सशस्त्र प्रहरी र नेपाली सेना समेत परिचालन हुने स्पष्ट व्यवस्था गरिएको छ। निर्वाचन विथोल्ने वा अशान्त बनाउने प्रयास भए सम्बन्धित बुथ रद्दसम्म हुन सक्ने चेतावनी उनले दिए।

मौन अवधिमा निगरानी कडा
मौन अवधिमा राजनीतिक दल र सम्बन्धित पक्षहरूले आचारसंहिता पालन गर्नुपर्नेमा जोड दिँदै उनले सामाजिक सञ्जालको दुरुपयोग नियन्त्रणमा विशेष ध्यान दिइएको बताए।
“मौन अवधिमा हुने आचारसंहिता विपरीत तथा कानुनविपरीत गतिविधिलाई सबै सुरक्षा निकायले एकीकृत रूपमा निगरानी गरेर कानुनी दायरामा ल्याउने व्यवस्था मिलाइएको छ,” उनले स्पष्ट पारे।

मतदातालाई निर्धक्क सहभागिताको आह्वान
प्रहरी महानिरीक्षक कार्कीले आम मतदातालाई निर्धक्क भएर मतदानमा सहभागी हुन आग्रह गरे।
“निर्वाचन स्वतःस्फूर्त, शान्तिपूर्ण र निर्बाध रूपमा सम्पन्न होस् भन्ने हाम्रो लक्ष्य हो। सुरक्षाकर्मीहरू मतदान स्थलसम्म सुरक्षित वातावरण सुनिश्चित गर्न परिचालित छन्,” उनले भने, “सबैले विवेकपूर्ण रूपमा आफ्नो अमूल्य मत प्रयोग गर्नुस्।”
भोलि हुने प्रतिनिधिसभा निर्वाचनलाई शान्तिपूर्ण, निष्पक्ष र विश्वसनीय बनाउन सम्पूर्ण सुरक्षा संयन्त्र उच्च सतर्कतामा रहेको प्रहरीले जनाएको छ।