नेपाल भ्रमण गर्ने पर्यटकमा वृद्धि

काठमाडौं, माघ २० । गत वर्षको जनवरी महिनामा भन्दा यो वर्षको जनवरीमा नेपाल भ्रमणमा आउने विदेशी पर्यटकको सङ्ख्या १५ प्रतिशतले बढेको छ । नेपाल पर्यटन बोर्डका अनुसार सन् २०२५ को जनवरीको तुलनामा यस वर्ष १५.७ प्रतिशत बढी पर्यटकले नेपाल भ्रमण गरेका छन् ।

गत वर्षको जनवरीमा ७९ हजार ९९१ पर्यटक नेपाल भित्रिएकामा यस वर्षको पहिलो महिनामै ९२ हजार ५७३ अन्तर्राष्ट्रिय आगन्तुकले नेपाल भ्रमण गरेका छन् ।

सन् २०२६ को तथ्याङ्क अनुसार पर्यटक आगमनमा शीर्ष स्थानमा रहँदै आएको भारतपछि चीन रहेको छ । कोभिडका कारण घटेका चिनियाँ पर्यटकको सङ्ख्यालाई भारतपछि अमेरिकाले उछिन्दै आएकोमा पछिल्लो समय चिनियाँ पर्यटकको आगमनमा समेत बढोत्तरी भएको छ । बोर्डका अनुसार यस वर्षको जनवरीमा भारतबाट २६ हजार ६२४ पर्यटक नेपाल  आएका छन् । त्यसपछि चीनबाट नौ हजार १०१, अमेरिकाबाट आठ हजार ४०६, बङ्गलादेशबाट पाँच हजार ८१४ र अस्ट्रेलियाबाट चार हजार ९५७ पर्यटक नेपाल भित्रिएका छन् । जनवरीमा सार्क मुलुकबाट ३९ प्रतिशत पर्यटक नेपाल आएका छन् । त्यस्तै एसियाली देशबाट २६ प्रतिशत, युरोपबाट १२ प्रतिशत पर्यटक नेपाल भित्रिएका छन् ।