नवनियुक्त मन्त्रीहरूलाई कूटनीतिक आचारसंहिताबारे परराष्ट्र मन्त्रालयको ब्रिफिङ

काठमाडौं, चैत २५ । परराष्ट्र मन्त्रालयले नवनियुक्त मन्त्रिपरिषद्का सदस्यहरूलाई नेपालको परराष्ट्र सम्बन्धका प्राथमिकताहरू तथा कूटनीतिक आचारसंहिताका विभिन्न पक्षबारे ब्रिफिङ गरेको छ।

आज प्रधानमन्त्री तथा मन्त्रिपरिषद्को कार्यालयमा आयोजित उक्त ब्रिफिङ कार्यक्रममा परराष्ट्र सचिव अमृतबहादुर राईले प्रस्तुति दिएका थिए । सचिव राईले विदेशी सरकार, कूटनीतिक नियोग तथा पदाधिकारीहरूसँग हुने सम्पर्क र भेटवार्ताका क्रममा अपनाइने शिष्टाचार तथा कूटनीतिक आचारसंहितासम्बन्धी विषयमा मन्त्रीहरूलाई जानकारी गराएका थिए।

यस ब्रिफिङले नवनियुक्त मन्त्रीहरूलाई अन्तर्राष्ट्रिय क्षेत्रमा नेपालको हित, परराष्ट्र नीतिका प्राथमिकता तथा कूटनीतिक मर्यादाका बारेमा प्रभावकारी रूपमा काम गर्न सहज हुने अपेक्षा गरिएको छ।