लुटपाटमा संलग्न चार जना पक्राउ

काठमाडौं, साउन २५ । काठमाडौंको वनस्थली क्षेत्रमा नगद तथा मोबाइल लुटपाटमा संलग्न रहेको आरोपमा प्रहरीले चार जनालाई पक्राउ गरेको छ।
जिल्ला प्रहरी परिसर काठमाडौंका अनुसार गत साउन १२ गते दिउँसो करिब २ बजे काठमाडौं महानगरपालिका–१६ वनस्थली क्षेत्रमा नगद तथा मोबाइल लुटपाट भएको थियो। घटनामा संलग्न व्यक्तिहरूको खोजी गर्ने क्रममा प्रहरी वृत्त बालाजुको टोलीले साउन १२ गते नै उनीहरूलाई पक्राउ गरेको हो।
प्रहरीले नयाँ बसपार्कस्थित एक गेस्ट हाउसको कोठाबाट मोबाइल फोन ७ थान, नगद ५७ हजार ९६१ रुपैयाँ, तरबार १ थान र हेक्सो ब्लेड १ थान बरामद गरेको जनाएको छ।
पक्राउ पर्नेमा उदयपुरको उदयपुरगढी गाउँपालिका–५ घर भई काठमाडौं महानगरपालिका–२६ बस्ने ३२ वर्षीय चरन मगर, तनहुँको शुक्लागण्डकी नगरपालिका–५ घर भई काठमाडौं–२६ गोंगबु बस्ने ३३ वर्षीय राजकुमार गुरुङ, महोत्तरीको बर्दिबास नगरपालिका–३ घर भई काठमाडौं–२६ नयाँ बसपार्क बस्ने ३३ वर्षीय प्रशान्त जंग शाही र रामेछापको रामेछाप नगरपालिका–५ घर भएका ३१ वर्षीय विजयबाबु घिसिङ रहेका छन्।
पक्राउ परेका चारै जनालाई जिल्ला अदालत काठमाडौंबाट पाँच दिनको म्याद थप गरी अनुसन्धान भइरहेको जिल्ला प्रहरी परिसर काठमाडौंले जनाएको छ।