जापानको उत्तर–पूर्वी तटीय क्षेत्रमा ६.९ म्याग्निच्युडको शक्तिशाली भूकम्प

काठमाडौं, असार ११ । जापानको उत्तर–पूर्वी तटीय क्षेत्रमा बिहीबार ६.९ म्याग्निच्युडको शक्तिशाली भूकम्प गएको छ। भूकम्पपछि सुनामीको खतरा नरहेको जापानको मौसम विज्ञान निकाय (जेएमए) ले जनाएको छ।
अन्तर्राष्ट्रिय सञ्चारमाध्यमहरूका अनुसार भूकम्प जापानको इवाते (Iwate) प्रिफेक्चरको तट नजिकै करिब ५० किलोमिटर गहिराइमा गएको थियो। अमेरिकी भूगर्भ सर्वेक्षण (USGS) ले पनि भूकम्पको परिमाण ६.९ म्याग्निच्युड रहेको पुष्टि गरेको छ।
भूकम्पको धक्का उत्तर–पूर्वी जापानका विभिन्न सहरसँगै राजधानी टोकियोसम्म महसुस गरिएको थियो। बिहानको व्यस्त समयमा आएको कम्पनका कारण केही क्षेत्रमा बुलेट रेल तथा स्थानीय रेल सेवा सुरक्षाका लागि अस्थायी रूपमा रोकिएको थियो।
जापानी अधिकारीहरूका अनुसार हालसम्म मानवीय क्षति वा ठूलो भौतिक नोक्सानीको कुनै तत्काल सूचना प्राप्त भएको छैन। सरकारद्वारा आपत्कालीन सूचना संकलन टोली परिचालन गरिएको छ भने सम्भावित राहत तथा उद्धार तयारीलाई पनि उच्च प्राथमिकतामा राखिएको छ।
जापानको मौसम विज्ञान निकायले सुनामीको चेतावनी जारी नगरेको र समुद्री सतहमा सामान्य उतारचढावबाहेक कुनै ठूलो प्रभाव नपर्ने जनाएको छ। अओमोरी प्रिफेक्चरमा जापानी भूकम्पीय तीव्रता मापन प्रणालीअनुसार ६–प्लस स्तरको कम्पन महसुस गरिएको थियो, जुन निकै शक्तिशाली मानिन्छ।
भूकम्पपछि आणविक ऊर्जा केन्द्रहरू तथा अन्य संवेदनशील पूर्वाधारमा कुनै असामान्यता नदेखिएको अधिकारीहरूले बताएका छन्। सन् २०११ को विनाशकारी भूकम्प र सुनामीबाट प्रभावित फुकुसिमा दाइइची आणविक केन्द्रमा समेत कुनै समस्या नदेखिएको जनाइएको छ।
प्रशान्त महासागरीय ‘रिङ अफ फायर’ क्षेत्रमा अवस्थित जापान विश्वकै सबैभन्दा बढी भूकम्प जाने मुलुकमध्ये एक हो। यस क्षेत्रमा विगत केही महिनायता पनि पटक–पटक शक्तिशाली भूकम्पहरू गइरहेका छन्।
एजेन्सीहरूकाे सहयाेगमा