आज देशका विभिन्न क्षेत्रमा वर्षा र हावाहुरीको सम्भावना

काठमाडौँ, जेठ १५ । देशभर आज सामान्यदेखि पूर्ण बदली रहने जल तथा मौसम विज्ञान विभागले जनाएको छ। विभागले शुक्रबार बिहान ८ बजे जारी गरेको मौसम पूर्वानुमानअनुसार गण्डकी, लुम्बिनी, कर्णाली र सुदूरपश्चिम प्रदेशसहित देशका हिमाली तथा पहाडी भू–भागका केही स्थानमा मेघगर्जन तथा चट्याङसहित मध्यम वर्षाको सम्भावना रहेको छ।
मधेश प्रदेशसहित कोशी र बागमती प्रदेशका तराई क्षेत्रका केही स्थानमा पनि वर्षा हुने अनुमान गरिएको छ। विभागका अनुसार सुदूरपश्चिम र गण्डकी प्रदेशका पहाडी भू–भागका एक–दुई स्थानमा भारी वर्षाको सम्भावना रहेको छ।
यस्तै, सुदूरपश्चिम, कर्णाली र लुम्बिनी प्रदेशका तराई तथा पहाडी क्षेत्रका धेरै स्थानमा हावाहुरी चल्न सक्ने चेतावनी दिइएको छ।
आज राति पनि लुम्बिनी र सुदूरपश्चिम प्रदेशलगायत देशका हिमाली तथा पहाडी भू–भागमा सामान्यदेखि पूर्ण बदली रहने पूर्वानुमान गरिएको छ। कोशी, बागमती र गण्डकी प्रदेशका तराई भू–भागका एक–दुई स्थानमा मेघगर्जन तथा चट्याङसहित वर्षा हुन सक्ने विभागले जनाएको छ।
विभागले सम्भावित वर्षा, चट्याङ र हावाहुरीबाट सतर्क रहन सर्वसाधारणलाई आग्रह गरेको छ।