खाली गराइएको सुकुम्बासी बस्ती क्षेत्र संरक्षण गर्न तारबार लगाउने

काठमाडौं, वैशाख १४ । काठमाडौं महानगरपालिकाका कार्यवाहक प्रमुख सुनिता डंगोलले अव्यवस्थित बस्ती हटाएर खाली गराइएको सार्वजनिक जग्गाको संरक्षणका लागि तत्काल तारबार लगाउने काम अघि बढाउन निर्देशन दिएकी छन् ।
थापाथलीस्थित वागमती नदी किनारामा हालै खाली गराइएको क्षेत्रको स्थलगत निरीक्षणपछि उनले प्रमुख प्रशासकीय अधिकृत सरोज गुरागाईंलाई सम्बन्धित निकायसँग समन्वय गरी सुरक्षा व्यवस्था मिलाउन निर्देशन दिएकी हुन्। यसका लागि अधिकार सम्पन्न वागमती सभ्यता एकीकृत विकास समिति लगायत सरोकारवाला निकायसँग सहकार्य गर्न भनिएको छ।
महानगरका सार्वजनिक निर्माण विभागमार्फत तारबार लगाउने कार्य शीघ्र सुरु गरिने जनाइएको छ। खाली गराइएका तथा आगामी दिनमा खाली गराइने स्थानहरूको संरक्षणलाई प्राथमिकतामा राखेर काम अगाडि बढाइने महानगरको तयारी छ।
यसैबीच, कार्यवाहक प्रमुख डंगोलले आइतबार नागार्जुनको इचङ्गुस्थित कोलोनी क्षेत्रको पनि निरीक्षण गरेकी छिन् । त्यहाँको भौतिक अवस्थाबारे जानकारी लिँदै वास्तविक भूमिहीन नागरिकलाई व्यवस्थित रूपमा बसोबास गराउने योजना रहेको बताइएको छ।
महानगरले अव्यवस्थित बस्ती व्यवस्थापनसँगै सार्वजनिक जग्गा संरक्षणलाई सँगसँगै अघि बढाउने नीति लिएको जनाएको छ।