छम्ह नेपालीं मेम्ह नेपालीलाई शत्रु खंकेगु अवांछित संस्कृति झीसं ब्वलंका : पूर्वजुजु ज्ञानेन्द्र

काठमाडौं, फाल्गुन ७। पूर्व जुजु ज्ञानेन्द्र शाहं २००७ या फाल्गुन ७ गते जुजु व जनता जानाः लोकतन्त्र पलिस्था याःगु दिंयात लुमंकाः देय्या वर्तमान अवस्थाप्रति गम्भीर चिउताः प्वंकाःदीगु दु । ७५ दँ न्ह्यः पुनःस्थापना जूगु लोकतन्त्र दिवसया लसताय् म्हिगः पुलांम्ह जुजु ज्ञानेन्द्र शाहं देशवासीपिन्त भिन्तुना सन्देश जारी यानादीगु खः ।

उगु सन्देशय् पुलांम्ह जुजु शाहं राष्ट्रपिता श्री ५ त्रिभुवन, ज्ञात व अज्ञात शहीद, लोकतन्त्रया निंतिं सक्रिय सकलसित श्रद्धाञ्जलि देछानादीगु खः । झापांं राजधानी लिहां वःबले लसकुस याःवःपिंत नं आभार प्वंकूसें थुकिं थःत जिम्मेवारीया भावनां प्रेरित याःगु धयादिल ।

पुलांम्ह जुजुं आःया अवस्थाय् देय् अप्राकृतिक अराजकताया चक्रय् फसे जूगु व देय्या पहिचान व अस्तित्व संकटय् लाःगु खँ कनादिल । वय्कलं विगतय् जूगु थीथी आन्दोलन व परिवर्तनं नेपाः व नेपाःमियात छु बिउगु दु धइगु खँय् आत्मनिरीक्षण यायेमाःगु आवश्यकता दु धयादिल।

झीगु शत्रु गरिबी व अस्थिरता खः, तर छम्ह नेपाःमियात मेम्ह नेपाःमिया शत्रु माने यायेगु अवांछित संस्कृतियात झीसं बल्लाकागु दु,’ वय्कलं धयादिल, ‘गुकिया कारणं थौं देय् इतिहासया दकलय् गहिरो पीडादायी अवस्थाय् थ्यंगु दु ।’

वय्कलं आपसी घृणा व द्वन्द्वया राजनीतियात पूर्ण रुपं अन्त्य यानाः सद्भाव व एकताया राजनीतिक संस्कृति ब्वलंकेत इनाप यानादिल । आः जुइत्यंगु चुनावया सन्दर्भय् पुलांम्ह जुजुं राष्ट्रिय समस्या समाधान यानाः जक निर्वाचन प्रक्रियापाखे वनेगु पाय्छि जुइगु खँ कनादिल। ‘चुनाव लिपा द्वन्द्व, अशान्ति व विवाद जुइमज्यूगु खँयात ध्यानय् तयाः राष्ट्रिय सहमति व सकसितं दुथ्याइगु समझदारी यानाः जक चुनावय् वनेगु सही लँपुइ जुइगु खः’ वय्कलं धयादिल ।

अधिकार जक मालेगु तर कर्तव्यया बारे बिचाः मयायेगु प्रवृत्ति अप्वया वनाच्वंगुलिं चिउताः प्वंकादिसें वय्कलं ‘पालं नयेगु’या बिचाः यानाः मखु, छप्पँ जुयाः ज्या यायेगु कर्तव्यया भावनां जक देय्यात न्हूगु गति बीफइगु बिचाः प्वंकादिल । पुलांम्ह जुजु शाहं नेपाःया धरातलीय यथार्थयात अनुकूल जुइगु व्यवस्था व व्यवस्थां जक दिगो लिच्वः बीगु धयादिसें विश्वया बांलाःगु पक्षयात उजागर यानाः झी न्ह्यःने वनेमाःगु खँय् बः बियादिल ।

न्ह्याबलें थें ूश्री पशुपतिनाथ सकसितं आशिर्वाद बीमाू धकाः थःगु सन्देश क्वचायेकूम्ह पूर्व जुजुं थ्व स्वयां न्ह्यः थःगु न्हापाया सन्देशय् ूश्री गोरखनाथूयात आह्वान यानादीगु खः ।