समानुपातिक बन्दसूचीबाट ७६ जना उम्मेदवारको नाम हटाउने निर्णय

काठमाडौं, माघ १९ । फागुन २१ गते सम्पन्न हुने प्रतिनिधि सभा सदस्य निर्वाचनको समानुपातिक निर्वाचन प्रणालीतर्फको निर्वाचन अधिकृतको कार्यालयमा राजनीतिक दलहरूबाट पेस भएका ७६ जना उम्मेदवारहरूको नाम बन्दसूचीबाट हटाउने निर्णय निर्वाचन आयाेगले गरेकाे छ ।

उम्मेदवारको बन्दसूचीका सम्बन्धमा पर्न आएका उजुरी, प्रचलित कानून बमोजिम तोकिएको उम्मेदवारको योग्यता र अयोग्यतासम्बन्धी व्यवस्था, निर्वाचन आयोगबाट विभिन्न मितिमा भएका निर्णय एवम् राजनीतिक दलबाट प्राप्त जानकारीसमेतका आधारमा उम्मेदवारहरूको विवरण रुजु गर्दा ७६ जना उम्मेदवारहरूको नाम बन्दसूचीबाट हटाउने निर्णय गरेकाे निर्वाचन आयाेगले जनाएको छ ।

बन्दसूचीबाट नाम हटाइएकामा कर्जा सूचना केन्द्रको कालो सूचीमा रहेका २१ जना, प्रदेश सभा सदस्य समानुपातिक निर्वाचन प्रणालीतर्फको बन्दसूचीमा नाम कायम रहेका २५ जना, निर्वाचन आयोगबाट तोकिएको जरिवाना भुक्तान नगरेका १० जना रहेका छन् । यस्तै पच्चीस वर्ष उमेर पूरा नभएका ४ जना, मतदाता नामावलीमा नाम समावेश नभएका १ जना, मतदाता नामावली पिछडिएको क्षेत्रमा नरहेका २ जना रहेका छन् । यसै गरि महिला उम्मेदवार पेस हुनुपर्नेमा पुरूष उम्मेदवार पेस भएका १ जना, नाम हटाउन भनी सम्बन्धित राजनीतिक दलबाट लेखिआएका १० जना र  माथि उल्लिखित कारणहरुमध्ये एकभन्दा बढी कारण भएका २ जनालाई हटाउने निर्णय भएकाे निर्वाचन आयाेगले जनाएकाे छ ।