शनिबार काठमाडौँमा समूहगत गतिविधिमा नियन्त्रण: जिल्ला प्रशासनको अत्यावश्यक सूचना

काठमाडौँ, असोज २४ । काठमाडौँ जिल्ला प्रशासन कार्यालयले शनिबार राजधानीका विभिन्न स्थानमा हुने सम्भावित समूहगत गतिविधि, जुलुस र र्‍यालीहरूमा कडाइ गर्ने भएको छ।

प्रमुख जिल्ला अधिकारी ईश्वरराज पौडेलले शुक्रबार जारी गरेको ‘अत्यावश्यक सूचना’ मा भनिएको छ— पछिल्ला दिनमा फरक–फरक समूहहरूले मोटरसाइकल र्‍याली, सभा–जुलुस तथा सामूहिक कार्यक्रम आयोजना गर्ने सूचना प्रशासनमा आएको छ। आगामी शनिबार (असोज २५ गते) ‘Gen Z आन्दोलन’ लगायतका कार्यक्रमहरू गर्ने तयारी भइरहेको भन्दै प्रशासनले यसप्रति विशेष सतर्कता अपनाएको जनाएको छ।

सूचनामा, “यस्ता गतिविधिहरूले राजधानीमा सार्वजनिक यातायात, शान्ति सुरक्षा र सर्वसाधारणको आवागमनमा असर पुर्‍याउने भएकाले कानून विपरीतका कुनै पनि गतिविधि नगर्न भनिएको छ।”

प्रशासनले काठमाडौं उपत्यकाभित्रका सुरक्षा निकायहरूलाई तत्कालीन संयन्त्र सक्रिय गर्न निर्देशन दिएको छ। जिल्ला प्रहरी परिसर, ट्राफिक प्रहरी र सशस्त्र प्रहरीको संयुक्त टोलीले शनिबार बिहानदेखि नै मुख्य सडक, चोक र संवेदनशील स्थानहरूमा निगरानी बढाउने तयारी गरेको बताइएको छ।

साथै, प्रशासनले स्थानीय तहहरू, सरोकारवाला निकाय र नागरिकलाई पनि अनावश्यक भीडभाड र समूहगत जमघट नगर्न आग्रह गरेको छ।

प्रशासक पौडेलको भनाइमा, “राजधानीमा नागरिकको सुरक्षालाई प्राथमिकता दिँदै पूर्वसूचना बिना कुनै पनि सभा–जुलुस गर्न पाइने छैन।”

काठमाडौँ प्रशासनले स्थानीय प्रशासन ऐन २०२८ को दफा ६(३) र सार्वजनिक शान्ति सुरक्षासम्बन्धी कानुनहरू अनुसार शनिबार सम्भावित अवाञ्छित गतिविधि रोक्न आदेश जारी गरेको हो।