यस वर्षको मनसुन नेपालबाट पूर्णरूपमा बाहिरियो

काठमाडौं, असोज २४ । नेपालमा यस वर्षको मनसुन पूर्ण रूपमा समाप्त भएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार २०८२ असोज २४ गते (सन् २०२५ अक्टोबर १०) का दिन देशभरबाट मनसुन समाप्त भएको घोषणा गरिएको हो।

विभागले शुक्रबार सार्वजनिक गरेको मनसुन बाहिर्गमन बुलेटिन–२ अनुसार मनसुन असोज २० गते (अक्टोबर ६) का दिन सुदूरपश्चिम, कर्णाली, लुम्बिनी र गण्डकी प्रदेशका पश्चिमी भू–भागबाट क्रमशः बाहिरिन थालेको थियो। त्यसपछि क्रमशः देशका मध्य र पूर्वी भू–भागबाट पनि मनसुन समाप्त भई आजदेखि सम्पूर्ण नेपाल मनसुनमुक्त भएको विभागले जनाएको छ।

विभागका अनुसार यस वर्ष मनसुन असोज २ गते (सेप्टेम्बर १८) बाट सुरु भएको थियो। गत वर्षको तुलनामा यो वर्ष मनसुन ८ दिन ढिलो गरी समाप्त भएको हो। विभागले मनसुनको अन्त्यसँगै स्थानीय हावा प्रणाली र पश्चिमी वायुप्रवाहको प्रभाव बढ्न सक्ने भन्दै पछिल्ला मौसम सूचना निरन्तर अवलोकन गर्न आग्रह गरेको छ।

नेपालमा सामान्यतया मनसुन असोजको पहिलो वा दोस्रो सातासम्म क्रमशः समाप्त हुने गर्छ। यस अवधिमा देशका अधिकांश भागमा मनसुनजन्य वर्षा घट्दै जाने र चिसो मौसमको सुरुवात हुने विभागले जनाएको छ।

मौसम पूर्वानुमान महाशाखाले सबै नागरिक, कृषक र सरोकारवालालाई आगामी मौसमी परिवर्तनका जानकारी नियमित रूपमा लिन अनुरोध गरेको छ।