सरुवा भएका कर्मचारीलाई तोकिएको अवधिमै रमाना दिन निर्देशन

काठमाडौं, भदौ ३० । भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालयले सरुवा भएका निजामती कर्मचारीलाई तोकिएको अवधिभित्रै रमाना दिएर सरुवा भएको कार्यालयमा हाजिर गराउन सबै मन्त्रालय, आयोग, सचिवालय, प्रदेश सरकार र स्थानीय तहलाई निर्देशन दिएको छ।
मन्त्रालयले मंगलबार परिपत्र जारी गर्दै निजामती सेवा ऐन, २०४९ तथा निजामती सेवा नियमावली, २०५० बमोजिम सरुवा भएका कर्मचारीलाई तोकिएको अवधिभित्र अनिवार्य रूपमा रमाना दिएर सरुवा भएको निकायमा हाजिर गराउनुपर्ने स्पष्ट कानुनी व्यवस्था रहेको जनाएको छ।
पछिल्लो समय सरुवा भएका कर्मचारीलाई निजामती सेवा नियमावली, २०५० को नियम ४० बमोजिमको बहाली म्याद सकिएपछि पनि रमाना नदिने, विभिन्न बहानामा साविककै कार्यालयमा राखेर कामकाज गराउने तथा सरुवा भइसकेपछि पनि पूर्वकार्यालयबाट तलबभत्ता भुक्तानी गर्ने गरेको जानकारी प्राप्त भएको मन्त्रालयले जनाएको छ।
यसका कारण स्थानीय तहमा जनशक्ति अभाव भई सेवा प्रवाहमा गम्भीर समस्या उत्पन्न भएको मन्त्रालयको भनाइ छ।
निजामती सेवा नियमावली, २०५० को नियम ३५ को उपनियम २ को खण्ड (ग) बमोजिम सरुवा भएका कर्मचारीलाई तोकिएको म्यादभित्र रमाना नदिई साविककै कार्यालयबाट तलबभत्ता भुक्तानी गरिएमा रमाना दिनुपर्ने म्यादभन्दा बढी अवधिको तलबभत्ता त्यस्तो रमाना नदिने कार्यालय प्रमुख र भुक्तानी दिने लेखा प्रमुखबाट असुलउपर गर्ने व्यवस्था रहेको मन्त्रालयले जनाएको छ।
मन्त्रालयले सरुवा भएका निजामती कर्मचारीलाई तोकिएको अवधिभित्र अनिवार्य रूपमा रमाना दिने व्यवस्था कार्यान्वयन गर्न सम्बन्धित सबै निकायलाई अनुरोध गरेको छ।
त्यस्तै, सरुवा भएका कर्मचारीलाई रमाना नगरी तलबभत्ता भुक्तानी गरेको विषयलाई लेखापरीक्षणका क्रममा बेरुजु कायम गरी निर्णय कार्यान्वयनमा सहयोग गर्न महालेखा परीक्षकको कार्यालयलाई अनुरोध गरिएको छ। मातहतका सबै कोष तथा लेखा नियन्त्रक कार्यालयलाई समेत परिपत्र गरी निर्णय कार्यान्वयनमा सहयोग गर्न महालेखा नियन्त्रकको कार्यालयलाई भनिएको छ।