विदेशमा रहेका नेपालीका लागि ‘मोफा मित्र’ मोबाइल एप सार्वजनिक

काठमाडौँ, जेठ १३ । परराष्ट्र मन्त्रालय अन्तर्गतको कन्सुलर सेवा विभागले विकास गरेको ‘मोफा मित्र’ मोबाइल एप सार्वजनिक गरिएको छ । विभागको त्रिपुरेश्वरस्थित कार्यालयमा आयोजित विशेष कार्यक्रममा परराष्ट्रमन्त्री शिशिर खनालले एपको औपचारिक शुभारम्भ गरेका हुन् ।
कार्यक्रमलाई सम्बोधन गर्दै मन्त्री खनालले लाखौँ नेपाली विदेशमा बसोबास गरिरहेको तथा वैदेशिक यात्रा र रोजगारीको क्रम निरन्तर बढिरहेकाले कन्सुलर सेवाको आवश्यकता झन् महत्वपूर्ण बन्दै गएको बताए । उनले डिजिटल प्रविधिको उपयोगमार्फत कन्सुलर सेवालाई थप सहज, प्रभावकारी र पहुँचयोग्य बनाउनुपर्नेमा जोड दिए ।
मोफा मित्र एपमार्फत विदेशमा रहेका नेपाली नागरिक तथा उनीहरूका परिवारले कन्सुलर सेवासम्बन्धी गुनासा तथा समस्याहरू अनलाइनमार्फत दर्ता गर्न सक्नेछन् । साथै, आफ्ना निवेदनको अवस्थाबारे समयमै जानकारी प्राप्त गर्ने, प्रगति ट्र्याक गर्न सक्ने तथा सम्बन्धित नेपाली नियोगसँग प्रत्यक्ष सम्पर्क गरी समस्या समाधानका लागि सहकार्य गर्न सक्ने व्यवस्था गरिएको छ ।
उक्त एप एन्ड्रोइड र आईओएस दुवै प्लेटफर्ममा उपलब्ध रहेको मन्त्रालयले जनाएको छ । यद्यपि, विदेशमा रहेर लागूपदार्थ सेवन गरेर अप्ठ्यारोमा परेका, मानसिक रूपमा समस्या भएकाकाे हकमा उक्त एपले कसरी सहयोग गर्न सक्छ भन्ने कुरामा अन्याैल देखिएकाे छ ।