रोशी खोलामा बाढी बढ्दा ५ विद्युतीय गाडी हाईस फस्यो, ६० बढी यात्रु सुरक्षित

काठमाडौँ, वैशाख २२ । अविरल वर्षाका कारण काभ्रेपलाञ्चोकस्थित रोशी खोलामा पानीको बहाव बढ्दा पाँच वटा विद्युतीय गाडी हाईस फसेका छन्।
राष्ट्रिय विपद जोखिम न्यूनीकरण तथा व्यवस्थापन प्राधिकरण (NDRRMA) का अनुसार रोशी गाउँपालिका–७ घुमाउने क्षेत्रमा उक्त घटना भएको हो। घटनापछि तत्काल उद्धारका लागि नेपाल प्रहरी, सशस्त्र प्रहरी बल र नेपाली सेनाको संयुक्त टोली परिचालन गरिएको छ।
जिल्ला प्रहरी कार्यालय काभ्रेका प्रहरी उपरीक्षकको नेतृत्वमा २५ जना, सशस्त्र प्रहरी बलका २५ जना तथा नेपाली सेनाको सेनानीको कमाण्डमा १८ जनाको टोली उद्धार सामग्रीसहित खटिएको प्राधिकरणले जनाएको छ।
हालसम्म करिब ६० देखि ६५ जना यात्रु तथा सवारी साधन सुरक्षित रहेको जानकारी प्राप्त भएको छ। खोलामा पानीको बहाव क्रमशः घट्दै गएको जनाइएको छ।
प्राधिकरणका अनुसार प्रहरीको रोक्दारोक्दै जबर्जस्ती सवारी सञ्चालन गरिएकै कारण यस्तो अवस्था सिर्जना भएको हो।
उद्धार कार्य जारी रहेको र सम्बन्धित सुरक्षा निकायसँग निरन्तर समन्वय भइरहेको प्राधिकरणले जनाएको छ