सरकारी निकायलाई स्वदेशी उत्पादन र सेवा प्रयोग गर्न प्रधानमन्त्री कार्यालयको अनुरोध

काठमाडौं, भदाै ३। प्रधानमन्त्री वालेन्द्र शाहको निर्देशन तथा स्वदेशी उद्यमी तथा व्यवसायीसँगको हालैको परामर्शका आधारमा प्रधानमन्त्री तथा मन्त्रिपरिषद्को कार्यालयले सबै सरकारी निकायलाई स्वदेशी उत्पादन तथा सेवाको प्रयोगलाई प्राथमिकता दिन अनुरोध गरेको छ।
प्रधानमन्त्री तथा मन्त्रिपरिषद्को कार्यालयले बुधबार पत्र जारी गर्दै स्थानीय सीप, उद्यम र उत्पादनको प्रवर्द्धन, रोजगारी सिर्जना तथा आयात प्रतिस्थापन गर्ने उद्देश्यले संघीय मन्त्रालय, प्रदेश सरकार, स्थानीय तह र विदेशस्थित नेपाली नियोगहरूलाई स्वदेशी वस्तु तथा सेवाको प्रयोगलाई प्राथमिकता दिन आग्रह गरेको हो।
कार्यालयले सरकारी निकायले स्टेशनरी, फर्निचर, निर्माण सामग्री तथा खाद्य वस्तु खरिद गर्दा सम्भव भएसम्म नेपाली उत्पादनलाई अनिवार्य रूपमा प्राथमिकता दिनुपर्ने जनाएको छ। त्यस्तै, सरकारी बैठक, समारोह तथा विभिन्न अवसरमा प्रदान गरिने कोसेलीमा नेपाली हस्तकलाका सामग्री प्रयोग गर्न पनि अनुरोध गरिएको छ।
पत्रमा सार्वजनिक निकायले बोलपत्रसम्बन्धी कागजात तयार गर्दा स्वदेशी वस्तु तथा सेवाको प्राथमिकता स्पष्ट रूपमा उल्लेख गर्नुपर्ने व्यवस्था गर्न भनिएको छ। स्वदेशी उत्पादनको प्रयोगसम्बन्धी व्यवस्थाको नियमित अनुगमन तथा त्रैमासिक निरीक्षण गर्नुपर्ने प्रावधानसमेत पत्रमा समेटिएको छ।
प्रधानमन्त्री कार्यालयका अनुसार सरकारी निकायको खरिद प्रणालीमार्फत स्वदेशी उत्पादनको बजार विस्तार गर्न सके स्थानीय उद्यमी तथा व्यवसायीलाई प्रोत्साहन पुग्नुका साथै रोजगारी सिर्जना, उत्पादन वृद्धि र आयातमा निर्भरता घटाउन सहयोग पुग्नेछ।
प्रधानमन्त्रीको सचिवालयले स्वदेशी उत्पादन तथा सेवाको प्रयोगलाई सरकारी निकायबाटै प्रभावकारी रूपमा कार्यान्वयन गर्न सम्बन्धित सबै निकायलाई आग्रह गरेको छ।