नेपाल वातावरण पत्रकार समूह र काठमाडौं विश्वविद्यालयबीच सहकार्य गर्ने समझदारी
धुलिखेल, १५ साउन । । नेपाल वातावरण पत्रकार समूह (नेवापस) र काठमाडौं विश्वविद्यालयबीच आज विश्वविद्यालयमा आयोजित समारोहमा सहकार्यसम्बन्धी सात बुॅदे समझदारी पत्रमा हस्ताक्षर भयो । समझदारी पत्रमा समूहका तर्फबाट अध्यक्ष कसमस बिश्वकर्मा र विश्वविद्यालयका तर्फबाट रजिष्ट्रार प्रा. डा. सुबोध शर्माबाट हस्ताक्षर भएको थियो ।
काठमाडौं विश्वविद्यालयका उपकुलपति प्रा. डा. भोला थापाको उपस्थितिमा भएको हस्ताक्षर कार्यक्रममा जानकारी गराइएअनु्सार विश्वविद्यालय र यसअन्तर्गतका संकायमा कार्यरत प्राध्यापक, विद्यार्थी तथा अनुसन्धानकर्ताहरुले गर्दै आएका अध्ययन, अनुसन्धान तथा खोजलाई सञ्चार माध्यममार्फत् आम नागरिक र नीति निर्मातासम्म पुर्याउने मुख्य लक्ष्यका साथ समझदारी भएको हो ।
समझदारी पत्रअनुसार ती अनुसन्धान तथा अध्ययनका निचोड तथा सुझावलाई व्यवहारमा कार्यान्वयन गर्ने वातावरण सिर्जना गर्न समूहले आफ्ना सञ्चार माध्यम (श्रव्यदृश्य, रेडियो, अनलाइन र छापा) मार्फत आफ्नो भूमिका निर्वाह गर्नेछ । र, विश्वविद्यालयले पनि आफुले गरिरहेका अध्ययन, अनुसन्धान तथा खोजहरु समूहलाई उपलब्ध गराउनेछ । ती सामग्रीहरु सार्वजनिक गर्दा लाग्ने आर्थिक स्रोत उपलब्ध भएसम्म विश्वविद्यालयले समूहलाई उपलब्ध गराउने छ । अन्य स्रोतहरुको पहिचान र परिचालनमा पनि सहकार्य गर्ने समझदारी भएको छ । यसैगरी वातावरण र दिगो विकासका मुद्दाहरुमा दुई संस्थाले संयुक्त रुपमा राष्ट्रिय बहसका कार्यक्रमहरु पनि गर्नेछन् ।
हस्ताक्षर कार्यक्रममा उपस्थित काठमाडौं विश्वविद्यालयका उपकुलपति प्रा. डा. भोला थापाले समझदारीले दुई संस्थाबीचको सहकार्यको बाटो खोलेको बताए ।
कार्यक्रममा मानविकी संकायका डिन प्रा. डा. सागरराज शर्मा, डा. सुधांसु दाहाललगायत उपस्थित पदाधिकारीहरुले सहकार्यका संभावना धेरै रहेको र समझदारी कार्यान्वयनमा आफुहरु उत्सुक रहेको बताएका थिए ।