काठमाडौं, १४ साउन । काठमाडौं महानगरपालिकाका ३२ वटै वडामा आज पुनः भेरोसेल खोप लगाइएकाे छ । चीनबाट ल्याइएकाे भेराेसेल खाेप ५० वर्ष र ५० वर्षभन्दा माथि उमेर भएका तर  पहिलो मात्रा खोप लगाउन छुटेकाहरुलाई आज खोप लगाउने व्यवस्था मिलाइएको काठमाडौं महानगरपालिकाले जनाएको छ । 

काठमाडौँ महानगरपालिकाका सबै ३२ वटै वडाअन्तरगतका खोप केन्द्रहरुमा भेरोसेल खोप लगाउन विहान १० बजेदेखि नै शुरू गरिएकाे थियाे । खाेप साँझ ५ बजेसम्म लगाइनेछ। यसका लागि केही खोपकेन्द्रहरुमा खोप लाउनेहरुको लामो लाइन बिहानैदेखि सुरु भइसकेको थियाे ।

विदेश जाने युवालगायत अन्य उमेर समूहका महत्वपूर्ण पेशाका व्यक्तिहरूले पनि प्राथमकिताका अाधारमा खोप पाउनेछन् । खोप लाउनका लागि नागरिकताको प्रमाणपत्र, पासपोर्ट, सवारी चालक अनुमति पत्रमध्ये जुनसुकै परिचय खुल्ने कागजपत्र लिएर जानुपर्नेछ । ती कागजात साथमा नहुनेले वडाको सिफारिश लिएर अाउन महानगरपालिकाले जनाएको छ ।