भदौ ७, काठमाडौं । भारतको हिमाचल प्रदेशमा आज बिहान केही घरहरू गर्ल्यामगुर्लुम्म भत्किएका छन्।
भारतीय सञ्चारमाध्यमहरूका अनुसार भारी वर्षाका कारण कुल्लु जिल्लाको अन्नी भन्ने ठाउँमा बिहान ती घरहरू बनेको ठाउँमा पहिरो गएको हो।
हिमाचल प्रदेशका मुख्यमन्त्री सुखविन्दर सिंह सुखुले घरहरू ढलेको भिडिओ सामाजिक सञ्जाल एक्स (पहिला ट्विटर) मा राखेका थिए। भिडियोमा सफा वातावरणमा घरहरू ढल्दै गर्दा धूलोकाे मुस्लो उठेकाे थियाे ।
घरहरू भत्किँदा मानवीय क्षति भने भएको छैन। मुख्यमन्त्री सुखुले उक्त क्षेत्रको जोखिमबारे पहिला नै थाहा भएकाले मानिसहरूलाई दुई दिनअघि सुरक्षित स्थानमा सारिएको बताएका छन्।
भारतीय मौसम विभागले हिमाचलमा अझै दुई दिन भारी वर्षा हुने भन्दै रेड अलर्ट जारी गरेको छ।
