भदौ ४, काठमाडाैं । आज परम्पराअनुसार नागकाे पूजा गरी घरका मूलढोकामा नागको तस्बिर टाँसेर नागपञ्चमी पर्व मनाईंदै छ ।
याे वर्ष साउनमा अधिकमास परेका कारण सौरमासअनुसार याेे पर्व भदौमा परेको हो । नागको तस्बिर टाँस्दा वर्षभर घरमा नाग, सर्प र बिच्छीलगायतका जीवले दुःख नदिने विश्वास गरिन्छ ।
वैदिक मान्यताअनुसार नागलाई सर्पको राजा मानिन्छ । नाग रिसाए भने पानीको अभाव हुने भएकाले पानीका लागि पनि नागलाई खुसी पार्न पूजा गर्ने परम्परा छ ।
आज काठमाडाैंको नागपोखरी, टौदह, ललितपुरकाे नागदह, भक्तपुरको सिद्धपोखरीलगायत देशभरका नागदह, कुण्ड र नाग मन्दिरमा विशेषरुपमा पूजा गरी नागलाई गाईको दूध, अक्षता, दुबो, खीर र रोटीलगायतका परिकार प्रसाद चढाउने गरिन्छ । नागकाे फाेटाे टाँस्न गाेबर प्रयाेग गर्ने चलन छ । नागपञ्चमीपछि हिन्दू धर्मावलम्बीका चाडपर्व शुरु हुने मान्यता छ ।
