भदौ ३, काठमाडौं । विपद् जोखिम सम्बन्धी स्वयंसेवी भावना बढाउन विद्यालयको माध्यमिक तहदेखि नै जनचेतना अभियान संचालन गर्नुपर्ने बताइएको छ ।
राष्ट्रिय विपद जाेखिम न्यूनीकरण तथा व्यवस्थापन प्राधिकरणद्वारा विश्व मानवीय दिवसका सन्दर्भमा आयाेजित ‘विपद् संवाद्’ श्रृंखला अन्तर्गत आयाेजित छलफल कार्यक्रममा उक्त विचार व्यक्त गरिएकाे हाे ।
यस वर्षको नारा जस्तोसुकै परिस्थितिमा पनि मानवीय सहायताका लागि सबै समुदायसँग काँधमा काँध मिलाएर काम गर्ने अर्थात् ‘जे भए पनि सँगै’ भन्ने रहेको छ । संयुक्त राष्ट्र संघले यो विश्वव्यापी पहलको नेतृत्व गर्छ ।
कार्यक्रममा प्राधिकरणका कार्यकारी प्रमुख अनिल पाेखरेल, सहसचिव रूद्र तामाङ, एनसेट नेपालका कार्यकारी निर्देशक सूर्यनारायण श्रेष्ठ, नेपाल रेडक्रस सोसाइटीका कार्यकारी निर्देशक उमेश ढकाल र प्राधिकरणका उपसचिव हिरादेवी पौडेलले नेपालमा मानवीय सहायता एवं स्वयंसेवाको अवस्थाबारे धारणा राखेका थिए ।
ज्यान गुमाएका मानवीय सहायताकर्मीहरुको सम्मानमा एक मिनेट मौनधारणपछि शुरू भएकाे कार्यक्रमको सहजीकरण डिपिनेट नेपालका उपाध्यक्ष राजु थापाबाट भएको थियो ।
सन् २००३ अगष्ट १९ मा इराकको राजधानी बगदादस्थित संयुक्त राष्ट्रसङ्घमा भएको आक्रमणमा परी राष्ट्रसङ्घका २२ कर्मचारीको मृत्यु भएको दिन पारेर सन् २००९ देखि यो दिवस मनाउँदै आइएको छ ।
