साउन २९, काठमाडौं । मुस्ताङको वारागुङ मुक्तिक्षेत्र–४ कागबेनीमा आइतबार राति ठाडो खोलामा आएको बाढीले १० घरसहित एक निर्माणाधीन पक्की पुल र काठे पुल पनि बगाएको छ ।
वारागुङ मुक्तिक्षेत्र—२ को झोङ, पुडाक र छेङ्गुरको शाखा नदी थुनिएर कागखोलामा आएको बाढीले कागबेनीमा १० घर र पक्की पुलसहित करोडौँको भौतिक सामग्री बाढीले बगाएको हाे।
बाढीले कागबेनीमा रहेको प्रहरीचौकी, धर्मशालामा पनि क्षति पुर्याएको छ। एउटा झोलुंगे पुल र तीन वटा विद्युत् पोल पनि ढलेकाले विद्युत् आपूर्ति बन्द भएको जनाइएको छ। दुई तलासम्म घर डुबेकाले तत्काल बिजुलीको लाइन छोड्ने अवस्था नरहेको बताईएकाे छ । आइतबार राति ११ बजेदेखि कागखोला र कालीगण्डकी नदीमा पानीको सतह घट्दै गएकोले सोमबार बिहानसम्म मानवीय क्षति नभएको मुस्ताङ प्रशासनले जनाएको छ।
झोङ भन्ने स्थानमा पहिरो गई कागखोलामा मिसिएपछि बाढी तल कागवेनी बस्ती पसेको जिल्ला प्रहरी कार्यालय मुस्ताङले पुष्टि गरेको छ। प्रहरीका अनुसार तीन दिनदेखि मुस्ताङमा पनि लगातार पानी परिरहेको छ।
बाढी आउनासाथ प्रहरी र त्यहाँ रहेको सेनाको टुकडीले स्थानीयलाई अलर्ट गराएकोले मानवीय क्षति नभएकाे तर प्रहरी चौकी समेत केही सर्वसाधारणका घर भत्काएको खबर छ।
अविरल वर्षासंगै ठाडो खोला थुनिएर आएको बाढीले अहिले कागबेनी गाउँको तल्लो बस्ती पुरै डुबानमा परेको हो। बाढीले कागबेनीको धर्मशाला, श्राद्धस्थल र अस्थायी काठेपुल बगाएको छ।
मुस्ताङको जोमसोम विमानस्थलस्थित मौसम मापन केन्द्रमा आइतबार रातिसम्मको २४ घण्टामा २५.८ मिलिमिटर वर्षा मापन गरिएको छ।
यता अविरल वर्षासँगैको बाढी र पहिरोका कारण म्याग्दीका मुख्य सडक तथा ग्रामीण सडक अवरुद्ध भएका छन्। म्याग्दीमा शुक्रवार साँझदेखिको निरन्तर वर्षाका कारण जिल्लाका मुख्य तथा ग्रामीण सडक अवरुद्ध भएका हुन्।
बेनी–जोमसोम, बेनी–दरबाङलगायत म्याग्दीका अधिकांश ग्रामीण सडक अवरुद्ध छन् ।आइतबार साँझसम्म पनि वर्षा भइरहेको र पहिरो खसिरहेकाले सडकहरु खुल्न सकेकाे छैन ।
