साउन २३, काठमाडौं ।
काठमाडौं उपत्यकाको बुढानिलकण्ठ, सुन्दरीजल, नगरकोट र आसपास अत्यधिक बर्षा भएको छ । काठमाडौं उपत्यकामा आज रातिदेखि नै लगातार वर्षा भैरहेको छ । उपत्यकाका धेरै नदी सतर्कताको लेबलमा पुगेका छन । यस्तै बाटाेहरू जलमग्न छन्, वस्ती डुवानमा परेका छन् ।
विष्णुमती, धोविखोला, मनोहरा लगायतमा जलसतह बढ्दो रहेको र सतर्कता तह नजिक पुगेकोले उपत्यकाको नदी तटीय क्षेत्रहरूमा रहनेहरू तथा नदी किनारको सडकबाट यात्रा गर्नेहरूले बिहान ११ बजेसम्म उच्च सतर्कता अपनाउन जल तथा माैसम विज्ञान विभागले सूचित गरेकाे छ ।
बाग्मती नदीको पधेरादोभान (कर्मैया) जलमापन केन्द्रमा जलसतह खतरा तह पार गरेको छ ।
बाढी पूर्वानुमान महाशाखाले जलसतह खतरा तह पार गरेको बताउँदै बढ्दो क्रममा पनि रहेको जनाएको छ ।
महाशाखाले रौतहट र सर्लाहीका बाग्मती नदी तटिय क्षेत्रमा हुनेहरूले आज बेलुकासम्मै उच्च सतर्कता अपनाउन अनुरोध गरेको छ ।
बाढी पूर्वानुमान महाशाखाका अनुसार बबई नदीको चेपाङ, बर्दियाको बाढीमापन केन्द्रमा जलसतहले खतरा तह (६.८) मिटर पार गरेको र बढ्दो रहेको छ । बर्दियाको बबई तटीय क्षेत्रमा हुनेहरू दिउँसो २ बजे सम्मै उच्च सतर्कता साथ सुरक्षति रहन महाशाखाले भनेकाे छ ।
नेपाली आकाशमा छाएको मनसुनी बादल र त्यस्ले पारी रहेको वर्षाले बर्दिया, धन्बास क्षेत्रमा पछिल्लो ६ घन्टामा मात्रै १५५ मिमि वर्षा भएको छ, जुन भारी वर्षा हो । यस्तै, सिन्धुलीको हरिहरपुर क्षेत्र मा २०५ मिमि, धनुसा बर्दिवास मा १७३ मिमि वर्षा भएकाे छ ।