साउन २०, काठमाडौं । प्रधानमन्त्री पुष्पकमल दाहाल ‘प्रचण्ड’ले गत बिहीबार राति भारतको उत्तराखण्ड राज्यको रूद्रप्रयागको गौरीकुण्डमा पहिरोमा परी १३ जना नेपाली नागरिकसहित १९ जना बेपत्ता भएकोमा दु:ख व्यक्त गरेका छन् ।
प्रधानमन्त्री दाहालले मृतकहरूप्रति भावपूर्ण श्रद्धाञ्जली अर्पण गर्दै बेपत्ता नागरिकहरुको यथाशीघ्र खोजीका लागि कूटनीतिक पहल गरिएको जानकारी उल्लेख गरे ।
यता, भारतका लागि नेपाली राजदूत डा.शंकर काेइरालाले ट्वीट गर्दै तीन जनाकाे शव भेटिएकाे र १३ जनाकाे खाेजतलाश जारी रहेकाे उल्लेख गरेका छन् ।
भारतको केदारनाथमा बिहीबार राति गएको पहिरोमा परी एकै घरका ७ जना सहित एकै गाउँका ९ जना बेपत्ता भएका छन् ।
काम गर्नकाे लागि भारत गएकाहरू पहिरोमा पुरिएर बेपत्ता भएपछि गाउँ अहिले शोकमग्न भएको छ। केदारनाथमा गएको पहिरोमा चौर गाउँका २८ वर्षीय अमर बोहोरा, उनकी पत्नी २६ वर्षीया अनिता, १४ वर्षीया छोरी सलिता, ८ वर्षीया छोरी पिंकी, ७ वर्षीय छोरा पृथ्वी, ६ वर्षीय छोरा जटिल र ३ वर्षीय छोरा वकिल बेपत्ता भएका छन् । उनीहरूसँगै चौरगाउँकै सुखीराम रावत र बमबहादुर बोहोरा बेपत्ता भएका हुन् ।
पहिरोमा पुरिएका युवाहरू केदारनाथमा मान्छे बोक्ने,पल्लीदारी गर्नेदेखि स्याउ बोक्ने र बगैँचाको हेरचाह गर्ने सम्मको काम गरिरहेका थिए ।
२ सय १९ घरधुरी रहेको चौरगाउँबाट मात्रै ७० भन्दा बढी परिवार काम खोज्दै भारतका विभिन्न क्षेत्रमा पुगेका छन् भने सबै घरका केही युवाहरू भारतमैं छन्।
