साउन १७, काठमाडौं । चीनको राजधानी बेइजिङमा गत शनिबारदेखि लगातार परेको वर्षाले बाढी र डुबान भएको छ। सडक, रेल वे र विमानस्थलमा पनि बाढी पसेर जलमग्न भएकाे भिडिओहरू सामाजिक सञ्जालमा भाइरल भइरहेका छन्।
डोक्सुरी टाइफुनका कारण पछिल्ला दिनमा बेइजिङमा अत्यधिक वर्षा भएको बताईएकाे छ । भिडियोहरूमा जापानमा सुनामी आउँदा गाडी बगाएजस्तै गरि गाडीहरू बगाएको देख्न सकिन्छ ।
चिनियाँ मौसमविद्हरूले गत शनिबारदेखि बुधबार बिहानसम्म बेइजिङ र आसपासका क्षेत्रमा ७४४.८ मिलिमिटर वर्षा भएको बताएका छन्। आँधीसहित चाङपिङको वाङ्जियायुआन जलाशय आसपासको क्षेत्रमा वर्षा भएको छ। सन् १८९१ मा ६०९ मिलिमिटर पानी परेको थियो।
१४० वर्षअघि बेइजिङमा वर्षाको मापन गर्न थालिएको थियो। अहिलेसम्मको रेकर्डमा लगातार पाँच दिनमा यति धेरै पानी कहिल्यै पनि परेको थिएन।
चीनको राजधानी बेइजिङलगायत आसपासका क्षेत्रमा हालै परेको मुसलधारे वर्षा एक सय ४० वर्षपछि भएको मौसम विज्ञान विभागका अधिकारीहरूले बताएका छन्।
राजधानी र आसपासका क्षेत्रमा शनिबारदेखिको मुसलधारे वर्षाबाट १३ करोड चिनियाँ प्रभावित भएका छन्। राजधानी बेइजिङ र छिमेकी हेबेई प्रान्तमा नौ लाख ७४ हजार चार सय जना विस्थापित भएका छन्।
भारी वर्षा र डुबानका कारण हजारौं मानिस विस्थापित भएका छन्। बाढी प्रभावितहरूलाई सैनिकका हेलिकप्टरले खानेकुरा-पानी वितरण तथा उद्दार गरिरहेकाे छ ।
एजेन्सीकाे सहयाेगमा
