असार २५, काठमाडौं । नेपालमा भूकम्पीय जोखिम आँकलन सम्बन्धमा हालसम्म भएका कार्य, अध्ययन तथा नतिजा सम्बन्धी विचार विमर्श गर्न, त्यसमा रहेका अपुग, थप अध्ययनको आवश्यकता र दिशा निर्देशका बारेमा सम्बन्धित निकायका अधिकारीहरु एवं विज्ञहरुको उपस्थितिमा विपद् संवाद गरिएको छ ।
विज्ञ तथा सहभागीहरुले भूकम्पीय जोखिम आँकलन नेपाल दक्षिण एसियाली क्षेत्रमा अग्रणी भए पनि ‘इनपुट प्यारामिटर’, सामाञ्जस्यता, सामाजिक संकटसन्नता आंकलन, मानकीकरण आदि क्षेत्रमा थप काम गर्नुपर्ने अवस्था रहेकोमा जोड दिनुभयो ।
संवादमा खानी तथा भूगर्भ विभागका सिनियर डिभिजनल सिस्मोलोजिष्ट डा. लोकविजय अधिकारी, शहरी विकास मन्त्रालयका सिनियर डिभिजनल इञ्जिनियर सुमन शालिके, भूकम्प प्रविधि राष्ट्रिय समाज, नेपालका कार्यकारी निर्देशक सूर्य नारायण श्रेष्ठ र ग्लोबल अर्थक्वेक मोडेलका सेस्मिक रिस्क इञ्जिनियर एलेस्रान्द्रो क्याल्डेरोनले नेपालमा भूकम्पीय जोखिम आँकलनमा भएका कार्यहरुबारे प्रस्तुतीकरण गर्नुभयो ।
प्राधिकरणका कार्यकारी प्रमुख अनिल पोखरेलले सबै सरोकारवाला निकायलाई एक ठाउँमा ल्याएर साझा मापदण्ड निर्माण गर्न तथा उचित समन्वय गर्न प्राधिकरण लागिपरेको बताउनुभयो । प्राधिकरणका सहसचिव रामेश्वर मरहट्टाले बहुप्रकोपीय जोखिम आंकलन विधि तथा कार्ययोजना तयार गर्न छलफलबाट महत्वपूर्ण पृष्ठपोषण प्राप्त भएको धारणा राख्नुभयो ।
भूकम्पीय प्रविधि राष्ट्रिय समाज, नेपालका उपकार्यकारी निर्देशक डा.रमेश गुरागाईंले छलफलको सहजीकरण गर्नुभएको थियो । प्राधिकरणले विपद् जोखिमका विषयवस्तुमाथि सरोकारवालाबीच सार्थक छलफल गर्न ‘विपद् संवाद’ आयोजना गर्दै आएको छ ।