जेठ ३, काठमाडौं ।
नेपाल रेडक्रस सोसाइटी, काठमाडौँ जिल्ला शाखाले आगामी बजेट तर्जुमा गर्दा सडक दुर्घटनाबाट हुने जोखिम कम गर्न प्राथमिकता दिन सरकारलाई सुझाव दिएको छ ।
रेडक्रसको अन्तर्राष्ट्रिय महासङ्घ (आइएफआरसी) को सहयोगमा काठमाडौँ जिल्ला शाखाअन्तर्गत सञ्चालन भइरहेको नयाँ पुस्ताका लागि सडक सुरक्षासम्बन्धी शैक्षिक कार्यक्रमको समीक्षा बैठकले सडक सुरक्षाका निम्ति महानगरले आगामी बजेट तर्जुमा गर्दा त्यससम्बन्धी व्यवस्था गर्न पहल गर्न माग गरेकाे हाे ।
काठमाडौँ महानगरले आफ्नो क्षेत्रभित्रका विद्यालयमा प्रत्येक शुक्रबारलाई बुक फ्रि फ्राइडेको अवधारणामा अगाडि बढाइरहेको र अतिरिक्त क्रियाकलापमा जोड दिइरहेको अवस्थामा विद्यार्थीलाई सडक सुरक्षासम्बन्धी ज्ञान दिन सके दुर्घटना न्यूनिकरणमा प्रभावकारीता अाउने कार्यक्रमका सहभागीले बताए।
सन् २०२२ को मे महिनादेखि सुरु भएको नयाँ पुस्ताका लागि सडक सुरक्षासम्बन्धी शैक्षिक कार्यक्रमको वार्षिक प्रगति विवरण पेस गर्दै कार्यक्रम सञ्चालित विद्यालयका शिक्षक तथा विद्यार्थी, पत्रकार र जिल्लास्तरका अन्य सरोकारवाला निकायको उपस्थितिमा कार्यक्रम भएको हो ।
सो कार्यक्रमको लक्ष्य भनेको किशोरकिशोरीलाई सडकमा हुने जोखिम बारेमा सिकाउनु र दुर्घटनाबाट कसरी जोगिने भन्ने कुरा सिकाउनु तथा दुर्घटना भइहालेको अवस्थामा त्यसको प्रतिकार्य गर्ने सीपको विकास गर्नु रहेको नेपाल रेड्क्रस सोसाईटी काठमाडौ जिल्ला शाखाका सभापति श्याम डोटेलले जानकारी दिए ।
कार्यक्रममा नेपाल रेडक्रस सोसाइटी काठमाडौं जिल्ला शाखा र विपद् पत्रकारिता सञ्जालका, (डिजेएन) बीचमा विपद न्युनीकरणका लागि अन्तरक्रिया कार्यक्रम समेत गरिएको थियो ।
कार्यक्रममा जिल्ला प्रशासन कार्यालय काठमाडौ, नेपाल प्रहरी, ट्राफिक प्रहरी, काठमाडौ महानगरपालिका तथा शिक्षा शाखाका अधिकृतहरु, रेडक्रसको अन्तर्राष्ट्रिय महसंघ, नेरेसो केन्द्रीय कार्यालय, कार्यक्रम संचालन भएका २१ वटा सरकारी बिद्यालयका शिक्षक, नायक नायिका ,विद्यार्थी तथा नेरेसो काठमाडौ जिल्ला शाखालगायत पदाधिकारीहरुको उपस्थित रहेको थियो ।