काठमाडाैं – काठमाडौं महानगरपालिकाले असोज १ गतेदेखि सार्वजनिक क्षेत्रमा धुम्रपान निषेध गरेको छ ।
महानगरपालिकाले सूचना जारी गर्दै असोज १ गतेदेखि सार्वजनिक स्थलमा चुरोड, बिडी, सिगार,तमाखु, सुल्झा, कक्कड, कच्चा सुर्ती, खैनी खुट्खा वा त्यस्तै प्रकारका अन्य पदार्थ सेवन गर्न निषेध गरेको जनाएको छ । सार्वजनिक स्थललाई धुम्रपान र सुर्तीजन्य पदार्थमुक्त क्षेत्र घोषणा गर्ने प्रयासलाई सहयोग गरिदिन पनि महानगरपालिकाले सबैसँग आग्रह गरेको छ ।
कानुन, सदाचार र सार्वजनिक हित तथा भलाइका हिसाबले काठमाण्डौ महानगरपालिकालाई धुम्रपान तथा सुर्तीजन्य पदार्थमुक्त क्षेत्र बनाउनको लागि जारी भएको सूचना अटेरी गर्नेलाई कारबाही र जरिबाना तिराइने समेत सूचनामा उल्लेख छ । स्मरणीय छ, सरकारी तवरमा पटक पटक सार्वजनिक स्थलमा धुम्रपान तथा मद्यपान निषेधका लागि सूचना जारी भए पनि कार्यान्वयनकाे अवस्था भने निराशाजनक रहँदै अाएकाे छ ।
