काठमाडौं, ११ भदौ । हिजोदेखि निरन्तर रुपमा परेको पानीले देशका विभिन्न भागमा बाढी, पहिरो तथा तराईका भागहरु जलमग्न बनाएको छ ।
बागमतीको पधेरादोभान (कर्मैैया)मा जलसतह खतरा तह पार गरेको र बढ्दो क्रममा रहेकोले सर्लाही र रौतहटका बागमती नदी तटीय क्षेत्रमा हुनेहरुलाई उच्च सतर्कता अपनाउन तथा सुरक्षित स्थानमा रहन जल तथा मौसम विज्ञान विभागले सचेत गराएको छ ।
यस्तै, चितवन जिल्ला माडी क्षेत्रको बनकट्टा, कल्याणपुर, छर्छरे, गोविन्दबस्ती र आसपासको क्षेत्रमा भारी वर्षमापन भएको तथा रिउखोला बनकट्टामा जलसतह बढेकोले रिउखोला तटीय क्षेत्रमा रातीसम्मै सतर्कता अपनाउन नेपाल बाढी सूचनामा भनिएको छ ।
नेपाल बाढी सूचनाले आज नारायणी, र यसका सहायक नदीहरुमा बहाव उल्लेख्य बढ्ने र केही सतर्कता तह पार गर्न सक्ने, कणर्ाली, महाकाली र यिनका सहायक नदीहरुमा बहाव बढ्ने उल्लेख गरेको छ । यस्तै, मझौला नदीहरु सबैमा बहाव उल्लेख्य बढ्ने, कमला, बागमती, तिनाउ लगायतका नदीमा बहाव खतरा तह आसपास पुग्ने उल्लेख छ । नेपाल फ्लड अलर्टकाअनुसार कन्काई, पूर्वी राप्ती, पश्चिम राप्ती, बबइमा सतर्कता तह आसपास पुग्नसक्ने पूर्वानुमान रहेकोले तटीय क्षेत्र तथा डुबान होचा स्थानमा रहनेहरुले उच्च सतर्कता अपनाउन आग्रह गरिएको छ ।
जल तथा मौसम विज्ञान विभागका मौसमविद मिन कुमार अर्यालकाअनुसार भदौ १२ गतेसम्म मौसम निरन्तर सक्रिय रहने देखिएको छ भने त्यसपछिका केही दिनपछि मात्र मौसम खुल्नेछ । विभागका अनुसार पछिल्लो समयमा लुम्बिनी प्रदेश, १ नम्बर प्रदेशमा भारी वर्षा भएको छ । यसैले तराईका जिल्ला तथा पहाडी जिल्लामा बस्नेहरुले विशेष सतर्कता अपनाउन आग्रह गरिएको छ ।
फोटोः सामाजिक सञ्जाल