काठमाडौं, २५ साउन । नेवार बौद्ध समाजमा आजबाट गुंला धर्म सुरु भएको छ । महिना दिनसम्म मनाइने यो नेवार बौद्ध समाजको मौलिक संस्कृति हो ।

धर्म गर्नका लागि यो समय अत्यन्त उपयुक्त भएको मान्यता नेवार बौद्ध समाजको रहेको छ । यसअनुसार बौद्धहरू बिहानै प्रसिद्ध स्वयम्भू महाचैत्यका साथै अन्य बौद्ध स्थल पुगी दर्शन तथा परिक्रमा गर्दछन् । यस अवधिभर विभिन्न टोल तथा वस्तीका बौद्ध नेवार बेग्लाबेग्लै रुपमा ‘गुंला बाजं’ सहित स्वयम्भूको दर्शन तथा परिक्रमा गर्न जान्छन् । सबै बाजाको बोल एउटै हुने र विभिन्न टोलीका बाजाहरूले जमघट हुनेहुँदा स्वयम्भू परिसर संगीतमय बन्ने हुन्छ । विभिन्न वाद्ययन्त्रसहितको छुट्टै पहिचान बनाएको ‘गुंला बाजं’ को संरक्षण तथा प्रवद्र्धनका लागि आजभोलि प्रशिक्षण तथा प्रतियोगिताको पनि आयोजना गर्ने गरिन्छ ।

टाढा भएका कारण सँधै विहान स्वयम्भू महाचैत्य पुग्न असहज भएका ललितपुर, भक्तपुर, कीर्तिपुरलगायतका नेवार बौद्धहरू आफ्नै ठाउँका बौद्ध स्थलहरूमा पुग्छन् । तर हप्तामा एक पल्ट वा कुनै उपयुक्त दिनमा स्वयम्भू आउने गरेको पनि पाइन्छ ।

बौद्ध धर्मको अभ्यास अटूट रुपमा गर्न नसके पनि कम्तीमा गुंला अवधीमा गर्नु पर्दछ भन्ने मान्यता नेवार बौद्ध समाजमा रहेको पाइन्छ । जाँडरक्सी सेवनलगायतका कतिपय आदतहरू यस अवधिमा त्याग्ने गरिन्छ ।