काठमाडौं महानगरको कार्यपालिका बैठकमा २७ विषयमा छलफल

काठमाडौं, चैत २३ । काठमाडौं महानगरपालिकाको ४८औँ कार्यपालिका बैठकमा विविधसहित २७ वटा विषयमा छलफल गरिएको महानगरले जनाएको छ।
बैठकले विवाद व्यवस्थापन तथा क्षतिपूर्ति कोष सञ्चालन कार्यविधि, २०८२ र मेट्रो मार्ट सञ्चालन तथा व्यवस्थापन कार्यविधि, २०८२ स्वीकृत गरेको छ। साथै, तीन वटा कार्यविधि संशोधनका लागि सैद्धान्तिक सहमति प्रदान गरिएको छ। संशोधनका लागि सहमति पाएका कार्यविधिमा श्रम बैंक सञ्चालन कार्यविधि, २०८०, पर्यटन प्रवर्द्धन कोष सञ्चालन कार्यविधि, २०७८ र साझेदारी तथा लगानी ऐन, २०७९ रहेका छन्।
त्यसैगरी बैठकले एउटा कानुन, एउटा मापदण्ड र आठ वटा कार्यविधि तर्जुमा गर्न सैद्धान्तिक सहमति दिएको छ। प्रस्तावित कानुनमा कार्यस्थलमा हुने लैङ्गिक हिंसा लगायत सबै प्रकारका लैङ्गिक हिंसाविरुद्धको कानुन रहेको छ।
कार्यविधितर्फ होमस्टे दर्ता तथा नवीकरण, सामुदायिक विद्यालय सार्वजनिक खरिद, संस्थागत विद्यालय छात्रवृत्ति व्यवस्थापन, प्रारम्भिक बाल विकास केन्द्र तथा शिशु स्याहार केन्द्र सञ्चालन, विशेष शिक्षा, वैकल्पिक शिक्षा, शैक्षिक गुठी सञ्चालन तथा सहयोगापेक्षी सडक आश्रित मानवमुक्त सहर व्यवस्थापनसम्बन्धी कार्यविधि तर्जुमा गर्ने सहमति भएको छ।
यसैगरी अस्थायी संरक्षण गृह सञ्चालनसम्बन्धी मापदण्ड तर्जुमा गर्न पनि बैठकले सैद्धान्तिक सहमति प्रदान गरेको महानगरले जनाएको छ।