सरकारमा सहभागिताबारे हल्ला निराधार : कुलमान घिसिङ

काठमाडौं, चैत १० । कुलमान घिसिङ ले नयाँ बन्न लागेको सरकारमा आफ्नो सहभागिताबारे सञ्चार माध्यम र सामाजिक सञ्जालमा फैलिएका चर्चाप्रति गम्भीर ध्यानाकर्षण भएको जनाउँदै ती हल्ला निराधार रहेको स्पष्ट पारेका छन्।

उज्यालो नेपाल का अध्यक्ष घिसिङले एक विज्ञप्ति जारी गर्दै नेपालको संविधानअनुसार गैर–सांसद व्यक्ति मन्त्री बन्न नसक्ने व्यवस्था रहेको स्मरण गराएका छन्। उनले जनताबाट प्राप्त जनादेशविपरीत कुनै वैकल्पिक बाटोबाट सांसद बनेर मन्त्री बन्ने कुरा कल्पनासमेत गर्न नसकिने बताएका छन्।

उनले सरकारमा सहभागिताबारे अहिलेसम्म कसैसँग कुनै किसिमको छलफल नभएको प्रष्ट पार्दै फैलाइएका समाचारप्रति विश्वास नगर्न आग्रह गरेका छन्।

घिसिङले आफ्नो पार्टी अहिले चुनावी परिणामलाई सम्मान गर्दै त्यसबाट सिकाइ लिँदै संगठन सुदृढीकरणमा केन्द्रित रहेको उल्लेख गरेका छन्। साथै, सुशासन र समृद्धिसहितको ‘उज्यालो नेपाल’ निर्माणप्रति आफ्नो प्रतिबद्धता यथावत् रहेको पनि उनले दोहोर्‍याएका छन्।

अध्यक्ष घिसिङले आफ्नो नाम जोडेर फैलाइएका भ्रामक प्रचारप्रति सचेत रहन सबैमा आग्रह गरेका छन्।