टेकुको बायोग्यास प्लान्ट सञ्चालनमा ल्याउन काठमाडौं महानगर र वैकल्पिक ऊर्जा प्रवर्द्धन केन्द्रबीच सम्झौता

काठमाडौं, साउन १८ । काठमाडौं महानगरपालिका र वैकल्पिक ऊर्जा प्रवर्द्धन केन्द्रबीच टेकुस्थित बायोग्यास (वेस्ट टु इनर्जी) प्लान्ट सञ्चालनमा ल्याउने सम्झौता भएको छ।
महानगरपालिकाका कार्यवाहक प्रमुख सुनिता डंगोलको उपस्थितिमा सोमबार महानगरपालिकाका प्रमुख प्रशासकीय अधिकृत सरोज गुरागाईं र केन्द्रका कार्यकारी निर्देशक नवराज ढकालले सम्झौतापत्रमा हस्ताक्षर गरेका हुन्। सहरमा उत्पादन हुने जैविक फोहरलाई आधुनिक र प्रविधिमैत्री ढंगले व्यवस्थापन गर्ने उद्देश्यले सम्झौता गरिएको महानगरपालिकाले जनाएको छ।
सम्झौतापछि कार्यवाहक प्रमुख डंगोलले परियोजनालाई निर्धारित समयमै सञ्चालनमा ल्याउन र दीगो व्यवस्थापन सुनिश्चित गर्न सम्बन्धित निकायले प्रभावकारी रूपमा काम गर्नुपर्नेमा जोड दिइन्। उनले प्लान्ट सञ्चालनमा आएपछि जैविक फोहर व्यवस्थापन थप व्यवस्थित हुनुका साथै ऊर्जा र जैविक मल उत्पादनमार्फत वातावरण संरक्षणमा पनि योगदान पुग्ने विश्वास व्यक्त गरिन्।
टेकुस्थित बायोग्यास प्लान्ट काठमाडौं महानगरपालिकाको एकीकृत दिगो फोहर व्यवस्थापन परियोजनाअन्तर्गत २०७२ सालमा निर्माण सुरु भई २०७५ सालदेखि सञ्चालनमा ल्याउने लक्ष्य राखिएको थियो। प्लान्टबाट दैनिक ३ मेट्रिक टन जैविक फोहर प्रशोधन गरी १४ किलोवाट विद्युत्, ३०० किलोग्राम जैविक मल र १३ हजार ५०० लिटर प्रशोधित पानी उत्पादन गर्ने योजना रहेको छ।
परियोजनामा काठमाडौं महानगरपालिका र युरोपेली संघको साझेदारीमा करिब एक करोड ८२ लाख रुपैयाँ लगानी गरिएको छ। महानगरपालिकाले यो सम्झौतासँगै लामो समयदेखि पूर्ण रूपमा सञ्चालनमा आउन नसकेको प्लान्टलाई पुनः सञ्चालनमा ल्याएर जैविक फोहरको दिगो व्यवस्थापन र ऊर्जा उत्पादनलाई प्रभावकारी बनाउने अपेक्षा गरेको छ।