ब्रड पिकमा हिमपहिरो : विश्वप्रसिद्ध आरोही निर्मल ‘निम्स’ पुर्जासहित १० आरोही बेपत्ता

काठमाडौं, साउन १५ । पाकिस्तानको काराकोरम हिमशृंखलामा अवस्थित ८,०४७ मिटर अग्लो ब्रड पिक आरोहणका क्रममा गएको हिमपहिरोमा विश्वप्रसिद्ध नेपाली पर्वतारोही निर्मल ‘निम्स’ पुर्जासहित १० जना आरोही बेपत्ता भएका छन्।
संस्कृति, पर्यटन तथा नागरिक उड्डयन मन्त्रालयअन्तर्गत पर्यटन विभागले शुक्रबार प्रेस विज्ञप्ति जारी गर्दै ब्रड पिक आरोहणका क्रममा आएको हिमपहिरोपछि नेपाली आरोहीसहित विभिन्न देशका पर्वतारोही बेपत्ता भएको जानकारी दिएको हो।
विभागका अनुसार बेपत्ता हुने नेपाली आरोहीहरूमा पुरबहादुर गुरुङ ‘युक्ता’, किली पेम्बा शेर्पा ‘किलु’, निमा शेर्पा, नवाङ थिन्दु शेर्पा, ग्यालु शेर्पा तथा विश्वप्रसिद्ध पर्वतारोही निर्मल पुर्जा ‘निम्स दाइ’ रहेका छन्। अन्तर्राष्ट्रिय सञ्चारमाध्यमका अनुसार हिमपहिरोपछि कुल १० जना आरोही सम्पर्कविहीन भएका छन्।
पर्यटन विभागले घटनाप्रति गहिरो दुःख व्यक्त गर्दै बेपत्ता आरोहीहरूको शीघ्र खोजी तथा उद्धारका लागि सम्बन्धित सबै निकायसँग आवश्यक समन्वय गर्न आग्रह गरेको छ।
विज्ञप्तिअनुसार बेपत्ता नेपालीहरूको खोजी तथा उद्धारका लागि पाकिस्तानस्थित नेपाली दूतावासमार्फत पाकिस्तान सरकारसँग निरन्तर समन्वय भइरहेको छ। साथै, उद्धार तथा खोजी कार्यलाई तीव्र बनाउन आवश्यक पहल जारी रहेको विभागले जनाएको छ।
ब्रड पिक विश्वका ८ हजार मिटरभन्दा अग्ला हिमालमध्ये एक हो। कठिन भूगोल र प्रतिकूल मौसमका कारण यो हिमाललाई चुनौतीपूर्ण आरोहण गन्तव्यका रूपमा लिइन्छ। हिमपहिरोपछि बेपत्ता आरोहीहरूको अवस्था अझै खुल्न नसकेको र खोजी तथा उद्धार अभियान जारी रहेको बताइएको छ।