१० जेठ, काठमाडौं । सञ्चार, सूचना तथा प्रविधि मन्त्री रेखा शर्माको सचिवालयले प्रेस नाेट जारी गर्दै लोककल्याणकारी विज्ञापन वितरण कार्यक्रम निरन्तर हुने जनाएको छ ।
बुधबार मन्त्रालयका सञ्चार विज्ञ नरेन्द्र केसीले जारी गरेको प्रेस नोटमा भनिएको छ, ‘चालु आर्थिक वर्षको विनियोजित रकम अपुग हुन गएकाले यसका लागि थप रकमको व्यवस्था गरिने र आगमी दिनमा लोककल्याणकारी विज्ञापन वितरण कार्यक्रम निरन्तर हुने मन्त्रीज्यूले स्पष्ट गरिसक्नुभएको व्यहोरा सम्बद्ध सबैमा अनुरोध गर्न चाहन्छु ।’
हिजो मंगलबार नेपाल पत्रकार महासंघ उपत्यका प्रदेश समितिका अध्यक्ष श्रीजन झाकाे अगुवाइमा गएकाे पत्रकारहरूकाे ज्ञापनपत्र बुझ्दै मन्त्री शर्माले “लोककल्याणकारी विज्ञापन रोक्ने सरकारको कुनै नीति नरहेको र नरोकिने” प्रतिवद्धता जनाएकी थिइन् ।
यसअघि विज्ञापन बोर्डले रकम अभावको कारण देखाउँदै यही जेठ १५ बाट लोककल्याणकारी विज्ञापनवापतको रकम उपलब्ध नगराउने निर्णय गरि सूचना जारी गरेको थियो । यसकाविरुद्ध नेपाल पत्रकार महासंघ आन्दोलित बन्दै बाेर्ड घेराउ तथा विज्ञापन बोर्डका अध्यक्ष लक्ष्मण हुमागाईँको कार्यकक्षमा तालाबन्दीसमेत गरेको थियो । पत्रकारहरुले विज्ञापन बोर्ड खारेजीको मागसमेत गरेका थिए ।
सरकारको यो भनाईसँगै पत्रकार महासंघ उपत्यका प्रदेश समितिले आन्दोलनका सबै कार्यक्रम सथगन गरेकाे समितिका महासचिव टेनिस राेकाद्वारा जारी विज्ञप्तिमा जनाइएकाे छ ।
